www.pchack.ucoz.org

Process Hacker 2.31 + Portable [2013]

orxanaz8970 — Thu, 12 Sep 2013 05:57:40 GMT

Process Hacker, kompüterin çalışması əsnasında icra edilən sistem xidmətlərini və proqramları detallı bir şəkildə göstərmə vasitəsidir.

$CUT$

Açıq qaynaq kodlu olma xüsusiyyəti daşıyan Process Hacker sayəsində sisteminizin çalışarkən hansı proqramların və əməliyyatların hakimiyyətində qaldığınızı göstərə bilərsiniz. İstəsəniz xidmət və proqramları başlada bilər, dayandıra bilər ya da sonlandıra bilərsiniz.

Process Hacker proqramının xüsusiyyətləri:

Sistemdə çalışan xidmət və proqramları sadə ya da fərdiləşdirilmiş şəkildə göstərmə
Detallı performans qrafiki
Xidmətlər üzərində tam idarə
Şəbəkə əlaqələri siyahısı
Bütün əməliyyatlarla əlaqədar detallı məlumatlandırma

“ICANN” müxtəlif dilli domenlər üzrə şuraların yaradılmasını sürətləndirməyə çağırıb

orxanaz8970 — Thu, 12 Sep 2013 05:46:44 GMT

"ICANN” müxtəlif dilli domenlər üzrə şuraların yaradılmasını sürətləndirməyə çağırıb

$CUT$

"ICANN” (internetdə domen adları və zonaların verilməsini həyata keçirən təşkilat - Internet Corporation for Assigned Names and Numbers) beynəlxalq korporasiyası 17 milli dildə domenlərin marağını təmsil edən şuraları mümkün qədər tez formalaşdırmağı tövsiyə edib. Bu barədə təşkilatın nümayəndəsi Nikoleta Muntyanu MDB, Mərkəzi və Şərqi Avropa inzibatçı və qeydiyyatçılarının 6-cı konfransında bəyan edib.

Milli dillər siyahısına ərəb, Çin, kiril, yunan, ivrit, yapon, Koreya, tamil, tay və digər dillər daxildir. N.Muntyanunun sözlərinə görə, məhz bu dillərdə olan domenlər yüksəksəviyyəli yeni domenlərin qeydiyyatı üçün "IDN Fast Track” proqramı üzrə təqdim edilən müraciətlərdə göstərilib. "ICANN”-ın proqramı dövlətlərə və ərazilərə təkcə latın dilində deyil, həm də milli əlifbanın hərflərinin yer aldığı domenlər almağa imkan verir.

Digər milli dillərin nümayəndələrindən ibarət şuraların yaradılması vacib hesab edilmir, lakin digər dillər təmsilçiləri tərəfindən təşəbbüs göstərilsə, onlar da yaradıla bilər, - N. Muntyanu qeyd edib. "ICANN” şuralara fəaliyyət üçün təlimatlar verəcək və onlara dillərin uyğunlaşdırılması üzərində işləməyi tövsiyə edir, - "Digit” yazır.

İlin sonunadək Azərbaycanın bütün poçt filiallarında struktur islahatları aparılacaq

pchack — Thu, 18 Sep 2008 05:03:26 GMT

Azərbaycan Rabitə və İnformasiya Texnologiyaları Nazirliyinin «Azərpoçt» Dövlət Müəssisəsi (DM) yaxın vaxtlarda rayon poçt filiallarının strukturunun yenidən qurulmasına başlayacaq.

Hazırda buna hazırlıq işləri görülür. İslahatlar Dünya Bankının həyata keçirdiyi «Maliyyə xidmətlərinin inkişafı Layihəsi» çərçivəsində yeni xidmətlərin təşkili məqsədilə aparılacaq. Bu islahatlara uyğun olaraq, rayon filiallarında yeni şöbələr, sektorlar yaradılacaq.

Dəyişikliklər «Azərpoçt»un 57 poçt filialını əhatə edəcək. Strukturun yenidən qurulması prosesi cari ilin sonunadək başa çatdırılacaq.

Layihə çərçivəsində artıq «Azərpoçt» DM-nin mərkəzi aparatının strukturu dəyişdirilmişdir, müştəri və bazar yönümlü yeni struktura keçid sona çatdırılmışdır. Oxşar struktura keçid Bakı şəhərində yerləşən poçt filiallarında da həyata keçirilmişdir. Azərbaycanda fəaliyyət göstərən 63 poçt filialından 6-da artıq yeni struktur yaradılmışdır.

İKT-nin 50 illiyinə həsr olunmuş “Kibernetika və informatika problemləri” mövzusunda II beynəlxalq konfrans öz işini yekunlaşdırıb

pchack — Thu, 18 Sep 2008 05:02:06 GMT

Qloballaşan dünyada İKT-nin rolu

Konfransda qloballaşan dünyada İKT-nin dinamik inkişafından, bu sahədə əldə olunan mühüm nəticə və nailiyyətlərdən söhbət açılıb, Azərbaycanın İKT sahəsində gələcək inkişaf perspektivləri, bu istiqamətdə imkanların genişləndirilməsi ilə əlaqədar olaraq yaranan elmi və praktiki problemlər müzakirə olunub.

Tədbiri giriş sözü ilə açan AMEA prezidenti akademik Mahmud Kərimov konfrans iştirakçılarını salamlayaraq müasir informasiya texnologiyalarının inkişaf etdirilməsinin Azərbaycanda da dövlətin qarşısında duran prioritet vəzifələrdən biri olduğunu, bu sahəyə xüsusi diqqət yetirildiyini vurğulayıb. Hər bir dövlətin, xalqın ümumi inkişaf səviyyəsinin, intellektual potensialının göstəricisi olan informasiya-kommunikasiya texnologiyalarının ölkəmizdəki inkişaf tarixindən danışan alim 50 il ərzində bu sahədə hazırlanan mütəxəssislərin yalnız ölkəmizdə deyil, onun hüdudlarından kənarda da tanındığını bildirib.

Qloballaşan dünyada müasir tələblərə müvafiq İKT-kadrların formalaşması, gənclərin elmi potensialının artırılmasının mühüm vəzifələrdən biri olduğunu qeyd edən M.Kərimov ölkəmizdə bu istiqamətdə mühüm işlərin görüldüyünü qeyd edib.

AR Rabitə və informasiya texnologiyaları naziri akademik Əli Abbasov Azərbaycanda İKT-nin inkişaf etdirilməsi sahəsində dövlət siyasətinin əsas prinsiplərindən danışaraq, ölkəmizin bu sahədə inkişaf səviyyəsinə görə Davos forumunun reytinq cədvəlində dünyada 67-ci yeri, MDB ölkələri arasında isə 1-ci yeri tutduğunu bildirib. Ə.Abbasov qloballaşma və inteqrasiya proseslərinin geniş vüsət aldığı müasir dövrdə informasiyanın əhəmiyyətindən, dövlətin yürütdüyü informasiya siyasətindən və ölkəmizdə informasiyaya olan ictimai tələbatın daha da artmasından, informasiyanın ötürülmə sisteminin inkişafı istiqamətindəki problemlərdən söhbət açıb. Yeni müstəqillik qazanmış ölkələr üçün bunun daha çox əhəmiyyət daşıdığını qeyd edən alim Azərbaycanla bağlı tarixi həqiqətlər, ölkənin daxili və xarici siyasəti, ölkədə baş verən hadisələr və s. haqqında məlumatların müxtəlif dövlətlərə sürətlə ötürülməsində yaranan problemlərdən, Şərq və Qərb dövlətləri arasında super informasiya magistralının yaradılmasının əhəmiyyəti və zəruriliyindən danışıb.

İtaliyanın Azərbaycandakı səfiri Can Luici Maşa, akademik İsmayıl İbrahimov, AMEA Kibernetika İnstitutunun direktoru akademik Telman Əliyev, AMEA-nın müxbir üzvü, Milli Məclisin deputatı Asəf Hacıyev, Larisa Lesko (Ukrayna) çıxış edərək müasir qloballaşma dövründə elm, təhsil, iqtisadiyyat və digər sahələrdə informasiya-kommunikasiya texnologiyalarının tətbiqinin vacibliyindən, bu sahədə qarşılıqlı əməkdaşlıq əlaqələrinin qurulmasının əhəmiyyətindən danışdılar, bu sahədəki təcrübələri və əldə etdikləri elmi nəticələrini bölüşdülər.

Tədbirdə həmçinin Abdus-Salam adına Beynəlxalq Nəzəri Fizika Mərkəzin direktorunun konfrans iştirakçılarına ünvanladığı məktubu oxundu.

Konfrans öz işini seksiyalar

üzrə davam etdirib

Konfrans öz işini sentyabrın 12-dək öz işini seksiyalar üzrə davam etdirib.

AMEA İnformasiya Texnologiyaları İnstitutunda (İTİ) “İnformasiya və kommunikasiya texnologiyaları”na həsr olunan seksiya iclasında AMEA İTİ-nin şöbə müdiri, texnika elmləri namizədi Rəşid Ələkbərov “Azərbaycan Respublikasında böyük hesablama resursları tələb edən mürəkkəb məsələlərin həlli üçün Superkompyuter Mərkəzinin yaradılması aspektləri” məruzəsi ilə çıxış edərək ölkəmizdə İnformasiya cəmiyyəti quruculuğunun əsas vəzifələrinə müasir informasiya-kommunikasiya infrastrukturunun formalaşdırılması, informasiya təhlükəsizliyinin təmin edilməsi, qlobal informasiya fəzasına inteqrasiya və digər vacib məsələlərin daxil olduğunu vurğulayaraq bu məsələlərin həlli zamanı meydana çıxan mürəkkəb hesablamalar və böyük həcmli yaddaş tələb edən məlumatları daha sürətlə emal edib, istifadəçilərə çatdırmaq üçün yüksək hesablama məhsuldarlığına və böyük yaddaşa malik olan superkompyuterlərdən istifadənin, bu sahədə dünya səviyyəli mütəxəssislərin hazırlanmasının zəruriliyini bildirdi. R.Ələkbərov ölkəmizdə Milli Superkompyuter Mərkəzinin yaradılması, burada həlli nəzərdə tutulan strateji əhəmiyyətli tətbiqi məsələlərin müəyyən olunması və onların reallaşdırılması üçün müvafiq elmi araşdırmaların aparılması istiqamətində məqsədyönlü işlər aparıldığını söylədi.

Məruzələr konfrans iştirakçıları tərəfindən maraqla qarşılanıb

“Ranqlama alqoritmi və onun sənədlərin referatlaşdırılmasına tətbiqi ” məruzəsi ilə çıxış edən AMEA İTİ-nin şöbə müdiri, fizika-riyaziyyat elmləri namizədi Ramiz Alıquliyev text mining, xüsusilə mətnlərin avtomatik referatlaşdırılmasının müasir İT-nin ən aktual və perspektivli istiqamətlərindən biri olduğunu söyləyərək, bunu ilk növbədə son illərdə informasiyanın çox böyük sürətlə artması ilə əlaqələndirdi. R.Alıquliyev öz məruzəsində mətnlərin avtomatik referatlaşdırılması üçün cümlələrin ranqlaşdırılmasına əsaslanmış alqoritm təklif etdi.

AMEA İTİ-nin şöbə müdiri, texnika elmləri namizədi Yadigar İmamverdiyev “Biometrik sistemlərin spufinq (aldatma) hücumlarına qarşı test edilməsi” məruzəsi ilə çıxış edərək biometrik texnologiyaların tətbiqi sahələri, biometrik sistemlərin təhlükəsizliyinin təmini, biometrik sistemlərin spufinq hücumlarına qarşı mübarizə üsulları, barmaq izinə əsaslanan biometrik sistemlərin spufinqi aşkarlama imkanlarının test edilməsi metodologiyası haqqında danışdı.

AMEA İTİ-nin sektor müdiri Ramiz Şıxəliyev “Biometrik sistemlərin təhlükəsizliyinin qiymətləndirilməsi metodologiyalarının analizi” məruzəsi ilə çıxış edərək, mövzuyla bağlı təklif olunmuş metodologiyanın prinsipləri haqqında danışaraq, bu sahədə ümumi meyarların biometrik texnologiyalara tətbiqi, müvafiq qiymətləndirmə metodologiyalarının və mühafizə profillərinin işlənməsinin vacib məsələlərdən biri olduğunu qeyd etdi.

“Elektron-elm konsepsiyasının həyata keçirilməsinin zəruriliyi haqqında” məruzəsi ilə çıxış edən AMEA İTİ-nin baş mütəxəssisi Təhmasib Fətəliyev “Elektron Azərbaycan” DP çərçivəsində dünya təcrübəsinə əsaslanaraq “Elektron elm” proqramının işlənməsinin alimlərimiz qarşısında duran aktual məsələlərdən biri olduğunu, bu proqramın yaradılmasında əsas məqsədin respublikanın elmi qurumlarında idarəetmənin və aparılan elmi-tədqiqat işlərinin bütün mərhələlərində səmərəliliyini yüksəltmək, Azərbaycan elminin ümumdünya elektron informasiya məkanına inteqrasiya olunmasını təmin etmək və s. ibarət olduğunu vurğulayaraq bu sahədə mövcud vəziyyətin araşdırılması, İC-nin tələblərinə cavab verən “E-elm” konsepsiyasının hazırlanması və ölkəmizdə həyata keçirilməsinin olduqca vacib və aktual məsələlərdən biri olduğunu bildirdi.

“Korporativ şəbəkənin məhsuldarlığının artırılması və keş-serverlərdə sənədlərin yenilənməsi meyarları haqqında” məruzəsi ilə çıxış edən AMEA İTİ-nin şöbə müdiri, texnika elmləri namizədi Əmiraslan Əliyev korporativ mühitdə İnternet xidmətlərinin həyata keçirilməsi zamanı qarşıya çıxan çatışmazlıqlar, xüsusi avadanlıq və proqram təminatlarının köməyilə korporativ şəbəkənin məhsuldarlığının artırılması yolları, CDN şəbəkələri və keşləşdirmə mexanizminin tətbiqinin üstün cəhətləri haqqında danışaraq, İnternet xidmətinin keyfiyyət göstəricilərinin artırılması və yüksək səviyyəli monitorinqin təşkili üçün təkliflərini irəli sürdü.

AMEA İTİ-nin aspirantı Səadət Nəzirova spamlarla mübarizə üsullarına dair məruzə ilə çıxış etdi. S.Nəzirova spamlarla mübarizə üsullarından olan formal və linqvistik metodlardan danışaraq, hər bir üsulun özünün inteqral keyfiyyət göstəricisi olduğunu bildirdi.

AMEA İTİ-nin aspirantı Rəhilə Həsənova “Elmi məqalələrin PageRank alqoritmi ilə qiymətləndirilməsi” məruzəsi ilə çıxış edərək, PageRank modelinə əlavə olunmuş çəki funksiyasının üstünlüklərindən söhbət açdı, PageRank alqoritminə məqalələrdən verilmiş istinadların sayının və jurnalların inpakt-faktorunun daxil edilməsi məsələlərinə toxundu.

“Biometrik sistemlərdə təhlükəsizlik boşluqlarının analizi” məruzəsi ilə çıxış edən AMEA İTİ-nin aspirantı Fərqanə Abdullayeva biometrik sistemdə zəifliklərin mövcudluğunun başlıca olaraq sistemin layihəsindən və strukturundan, istifadə edilən biometrik xarakteristikadan və ya xarakteristikalardan (məsələn, barmaq izi, gözün qüzehli qişası və s.), idarəetmə siyasətindən asılı olduğunu qeyd edərək, bu sahələrin hər birinin özünə xas zəifliklər çoxluğu ilə qarşılaşdığını və lazımi əks-tədbirlərin görülməsi üçün analiz edilməli olduğunu bildirdi.

Tədbirdə həmçinin Daşkənd Avtomobil Yolları İnstitutunun əməkdaşı Saqdi Formanov “Avtonom naviqasiya daşınma vasitələrinin inkişafı” məruzəsi ilə, AMEA İTİ-nin dissertantları Həmid Zərgəri Əsl “Mobil telefonların xronoloji loqları əsasında sosial şəbəkələrin modelləşdirilməsi” məruzəsi ilə və Sadiq Derakşande “İnformasiya təhlükəsizliyi risqlərinin qeyri-səlis çoxluqlarla modelləşdirilməsi”, Azərbaycan Texniki Universitetindən Yusif Qaziyev “Telekommunikasiya sistemlərinin mikrodalğalar mexanizminin çoxsaylı modelləşdirmə proqramlarının təhlili”, AMEA Kibernetika İnstitutunun əməkdaşı Şükür Məmmədov “Şəbəkənin ümumi mənbə sistemində işarələyici hərəkətin aşağı qatda işarələnərək hesablanma metodu”, Azərbaycan Dövlət Neft Akademiyasından İbrahim İbrahimov “Azərbaycan mətnlərində istifadə olunan cümlələrin və sözlərin təhlili”, AMEA Kibernetika İnstitutundan Rauf Fətullayev “Dilmanc maşın tərcümə sisteminin tərcümə keyfiyyətinə təsir edən amillərin statistik təhlili”, Azərbaycan Dövlət İqtisad Universitetinin əməkdaşı Sərdar Şabanov “Elmi nailiyyətlərin birgə qiymətləndirilməsi”, AMEA Dilçilik İnstitutundan texnika elmləri namizədi Əbülfət Fətullayev “Dilmanc maşın tərcümə sisteminin türk-Azərbaycan tərcümə modulu” məruzələri ilə çıxış etdilər.

CISCO “Virtual ofis” texnologiyasını təqdim etmişdir

pchack — Thu, 18 Sep 2008 05:00:55 GMT

CISCO “Virtual ofis” texnologiyasını təqdim etmişdir

Cisco şirkəti bazara özünün “virtual ofis”ini çıxarıb. Sözügedən həll yüksək səviyyəli təhlükəsizliyi ilə fərqlənir, və şirkətlərə “genişlənməyə”, həmçinin tez-tez ofisdən kənarda, o cümlədən şirkətin filiallarında və evdə çalışan əməkdaşlara korporativ ofis xidmətlərinin çatdırılması hesabına onların əmək məhsuldarlığını artırmağa imkan verir.

Cisco Virtual Office həlli iri və orta biznes çərçivəsində sürət yığan tendensiyalara uyğundur: kollektivlər tez-tez “yayılmış” olurlar və müəssisə kənarında olanda belə korporativ proqramlara və xidmətlərə ehtiyac duyurlar. CVO marşrutlaşdırma, kommutasiya, təhlükəsizlik, simsiz rabitə, İP-telefoniya, qaydaların idarəedilməsi texnologiyalarını daxil edir. Video, səs və verilənlərin ötürülməsini, həmçinin simsiz xidmətlərin çatdırılmasını təmin etməklə sözügedən ofis həlli mərkəzi nöqtədən idarə olunur.

Əməkdaşlara müxtəlif yerlərdə çalışmağa və korporativ ofisdə istifadə etdikləri texnologiya və xidmətlərdən istifadə etməyə imkan yaradan bu həll yetərincə çevik olmuşdur. Kollektiv ofis mühitinin bu cür “genişlənmə”si təhlükəsiz şəbəkə mühiti çərçivəsində İP-kommunikasiyaların yardımı ilə etibarlı şəkildə qorunan səs və videoya girişi daxil edir.

Cisco-nun virtual ofisi tam zamanında gündəmə çıxdı: neft məhsullarının və elektrik enerjisinin qiymətlərinin bahalaşması şəraitində şirkətlər yeni çevik və iqtisadi cəhətdən əlverişli iş üsullarını axtarmaq məcburiyyəti qarşısında durublar; CVO isə onlara geniş yayılmış kollektiv çərçivəsində qrup fəaliyyəti üçün əla qorunan mühiti təqdim edir.

Çeviklik hətta əlverişsiz hava və iqlim şəraitində biznesi davamlı şəkildə aparmağa və artıq lazım olmayan ofis binalarının kirayəsinə xərclənən vəsaitlərə qənaət etməyə yardım edir. Bundan əlavə ofisdən kənarda çalışan əməkdaşlar şirkətdə istifadə etdikləri həmin rabitə texnologiyaları və iş qrupu hesabına öz əmək məhsuldarlıqlarını artırırlar.

Yeni həllin ən cəlbedici xüsusiyyətlərindən biri - “zero-touch setup”dır (tamamilə avtomatlaşdırılmış sazlanma). Sözügedən funksiya sayəsində müvafiq bilik və təcrübəsi olmayan əməkdaşlar şəbəkə sistemlərinin quraşdırılması və sazlanması sahəsindəki cavabdehlikdən azad edilirlər. Avtomatik quraşdırılma və sazlanma şirkətlərdə əminlik yaradacaq ki, əməkdaşları heç bir şeyi korlamadan və texniki dəstək xidmətlərinə ehtiyac duymadan minlərlə iş yerlərində çalışa bilərlər.

Cisco şirkətinin təhlükəsizlik üçün şəbəkə sistemləri və həlləri üzrə vitse-prezidenti Mari Xattar (Marie Hattar) qeyd edir ki: “Cisco Virtual Office təhlükəsiz mobil fəaliyyətin imkanlarını genişləndirir və istənilən yerdə istənilən zaman məsafədən əməkdaşlıq üçün zəruri ehtiyatları təqdim edir. Cisco-nun virtual ofisi mobil və ofisdən kənarda çalışan əməkdaşlara əla qorunan mühit çərçivəsində bütün ofis texnologiyalarını və korporativ sinfli xidmətləri təqdim etməklə distant fəaliyyətin üstünlüklərini gücləndirir. Sözügedən həll biznesin çevikliyini artırır, bəzi hallarda isə ezamiyyət və yerdəyişmələrdən imtina hesabına ətraf mühiti qorumağa yardım edir. Bundan əlavə, o, korporativ ofislərin saxlanılması üçün nəzərdə tutulmuş xərcləri də azaldır”.

Mari Xattarın sözlərinə görə müxtəlif məkanlarda çalışan əməkdaşların sayı artdıqca və müxtəlif yerlərdən korporativ şəbəkələrə və məlumatlara daxil olmaq üçün yeni üsullar gündəmə çıxdıqca şirkətlərə distant şəkildə çalışan əməkdaşların etibarlı şəkildə qorunmasını təmin edən çevik texnoloji infrastruktur tələb olunur. Cisco həllinin təhlükəsizlik funksiyaları müəssisəyə əla qorunan mobil rabitəni quraşdırmağa, qrup fəaliyyətini inkişaf etdirməyə və əmək təşkilinin yayılmış üsullarını tətbiq etməyə imkan verirlər, və əslində onlar tamamilə mərkəzləşdirilmiş ofis işinə arxalanan modellərdən daha etibralı olurlar.

Windows Vista proqramının alternativ variantının hazırlanması barədə araşdırmalar aparılır

pchack — Thu, 18 Sep 2008 04:59:17 GMT

Hewlett-Packard şirkəti yaradılacaq yeni əməliyyat proqramını Linux sisteminin üzərində quracaq. Ekspertlər bu yeniliyi HP markasının digər şirkətlərdən asılılığı azaltmaq üçün atdığı strateji addım kimi dəyərləndirir.

HP laboratoriyasının keçmiş direktoru Susie Wee-nin başçılığı altında aparılan tədqiqat və inkişaf işləri 9 aydır ki, davam edir. İlk dövrlərdə sadəcə HP məhsulları üçün nəzərdə tutulmuş əməliyyat proqramları sonradan bütün bazara təqdim olunacaq.

Bu cür addımları vaxtı ilə Intel və Dell şirkətləri də atıb. Belə ki, İntel özünə məxsus və açıq resurs hesab olunan “Moblin Software” Platformasını inkişaf etdirmək üçün “Opened Hand” proqramlama şirkətini alıb.

Keçən il bazara təqdim olunan “Windows Vista” proqramı bir neçə aparıcı FK(fərdi kompyuter) istehsalçısı tərəfindən tənqidlərə məruz qalıb.

Proqramın reytinqinin aşağı olmasında Apple şirkətinin apardığı “I’m a Mac, I’m a PC” kampaniyasının da təsiri olmuşdur. Microsoft “Windows Vista” imicinin bərpası üçün bugünə qədər $300 mln. pul xərcləyib.

«Azercell» SimSim abunəçiləri üçün yeni kampaniya elan edib

pchack — Thu, 18 Sep 2008 04:57:37 GMT

Azərbaycanın mobil rabitə operatoru «Azercell Telecom» bütün SimSim abunəçiləri üçün yeni KonturPay kampaniyasını elan edib.

«Azercell»dən verilən məlumata görə, kampaniya cari ilin sentyabr ayının 15-dən dekabrın 31-dək keçirilir.

Bir təqvim günü ərzində istənilən eyni nominallı 2 ədəd SimSim danışıq kartı yükləyən abonent, pay olaraq, həmin nominalda daha bir kart əlavə qazanacaq. Hədiyyə konturlar balansa gün ərzində yüklənilir.

Hansı konturyükləmə xidmətindən istifadə olunduğundan asılı olmayaraq, kampaniyada bütün kartlar iştirak edir. Bir nominallı kartdan gün ərzində yalnız bir dəfə bonus qazanmaq olar.

Azərcell Telecom 1996-cı ilin yanvarında yaradılıb. «Turkcell İletişim Hizmetleri A.S» və Azərbaycanın Rabitə və İnformasiya Texnologiyaları Nazirliyi şirkətin ilk təsisçiləri kimi çıxış edib. Şirkət həmin ilin 15 dekabrında abunəçilərinə öncədən ödəmə əsasında xidmətlər təklif edərək fəaliyyətə başlayıb. 1998-ci ildə SimSim tarif planını tətbiq edib. Bu gün operator abunəçilərinin sayı 3,5 mln. nəfərdən çoxdur.

Azercell” stansiyaların sayını artırmaqda davam edir Sentyabr ayının əvvəlinə şirkətin 1473 radio-baza stansiyası fəaliyyət göstərir

pchack — Thu, 18 Sep 2008 04:52:47 GMT

Əhatə dairəsini genişləndirmək və mobil rabitənin keyfiyyətini daim artırmaq “Azercell Telekom” MMC-nin fəaliyyətinin prioritet istiqamətlərindən biridir. Keyfiyyətli rabitəni təmin etmək məqsədilə “Azercell” daima Azərbaycanın bütün ərazisində yeni radio-baza stansiyaları quraşdırır. Bu baxımdan, bu ilin avqust ayının yekunlarını da təqdirəlayiq hesab etmək olar. Çünki avqust ayında “Azercell Telekom” MMC 20 yeni stansiyanı abonentlərinin istifadəsinə verib. Avqustda istifadəyə verilən stansiyalardan 6-sı Bakı, 1-i Abşeron, digərləri isə Astara, İmişli, İsmayıllı, Lerik, Qəbələ, Qobustan, Quba, Tərtər, Tovuz, Ucar və Zaqatala rayonlarının ərazisində quraşdırılıb.

Ümumilikdə sentyabr ayının əvvəlinə “Azercell”-in 1473 stansiyası fəaliyyət göstərir. Həmçinin 2 rezervləşdirilmiş abonent bazası, 15 baza stansiyalarına nəzarətçi sistemi, 16 mobil rabitə kommutasiya mərkəzi quraşdırılıb.

Stansiyaların sayının artması “Azercell” abonentlərinə ölkəmizin istənilən guşəsində bu operatorun xidmətlərindən daha keyfiyyətli surətdə yararlanmağa imkan verir.

CDMA- simsiz rabitə xidməti QARABAĞDA

pchack — Thu, 18 Sep 2008 04:50:52 GMT

Aztelekom” İB-nin CDMA simsiz rabitə xidməti şəbəkəsinin genişləndirilməsi istiqamətində görülən tədbirlər çərçivəsində Ağdam rayonunun Quzanlı və Sabirabad rayonunun Şəhriyar kəndlərində yeni baza stansiyalarının quraşdırılması başa çatdırılmışdır. Quzanlı kəndində quraşdırılmış stansiya Ağdam rayonunun 17 yaşayış məntəqəsini CDMA-nın əhatə dairəsinə daxil etməyə imkan vermiş, Sabirabad rayonunda isə 5 telefonlaşdırılmamış yaşayış məntəqəsi CDMA simsiz rabitə xidməti şəbəkəsi üzərindən telefonlaşdırılmışdır.

“Aztelekom” İB-nin Baş direktorunun I müavini, texniki direktor Zahir Vəliyev bizimlə söhbətində bildirdi ki, hazırda birliyin CDMA simsiz rabitə xidməti şəbəkəsi üzrə abunəçilərin ümumi sayı 12.253 təşkil edir. 408 indeksi üzrə abunəçilərin sayı 3.727, Zaqatala 1.208, Şəki 1.164, Lənkəran 1.124, Masallı 952, Gəncə 824, Quba 647, Xaçmaz 513, Şamaxı 528, Şəmkir 449, Mingəçevir 478, İmişli 363, Kürdəmir 112, Balakən 105, Qax 43 ədəddir.

Baş direktorun I müavini sözlərinə davam edərək bildirdi ki, cari ildə “Aztelekom” İB-nin CDMA simsiz rabitə xidməti şəbəkəsinin genişləndirilməsi məqsədilə Zaqatala TKQ-də Muxax və Katex məntəqələrində əlavə baza stansiyaları quraşdırılmışdır. Qoyulmuş avadanlıqlar 33 yaşayış məntəqəsini əhatə etmişdir, bunlardan 5 yaşayış məntəqəsi (Sabunçu-1, Sabunçu-2, Cimcimax, Ciciqana və Qəbizdərə) telefonlaşdırılmamış yaşayış məntəqələridir. Zaqatala TKQ üzrə rayon mərkəzi daxil olmaqla 61 yaşayış məntəqəsindən 59 yaşayış məntəqəsi CDMA-nın əhatə dairəsinə daxildir.

Xaçmaz TKQ-də bir ədəd mini baza stansiyası Xudatda, bir ədədi isə Nabranda quraşdırılmışdır. Qoyulmuş baza stansiyaları 36 yaşayış məntəqəsini əhatə edir, bunlardan 10 yaşayış məntəqəsı (Xəzərli, Seyidlikənd, Sabir oba, Çaxçaxlı, Gödəkli, Şərif oba, Baraxum, Tikan oba, Aslan oba, Aşağı oba) telefonlaşdırılmamış yaşayış məntəqəsidir. Xaçmazın 149 yaşayış məntəqəsindən 147-si CDMA-nın əhatə dairəsindədir.

“Aztelekom” İB-nin CDMA simsiz rabitə xidməti şəbəkəsinin genişləndirilməsi məqsədilə bir ədəd böyük və bir ədəd mini BTS Kürdəmir TKQ-də quraşdırılmış, 26 telefonlaşdırılmamış yaşayış məntəqəsindən 24-ü (İsmayıllı, Böyük Kəngərli, Ucarlı, Bağman, Kariz Əyribənd, Qaramahmudlu, Ərəbxana, Yeni Şıxımlı, Bala Kəngərli, Təklə, Qocalı, Carlı, Pirəköçə, Məhərrəmli, Sovla, Söyüdlər, Quşlar, Xəlsə, Beyi, Çölqubalı, Dayıkazımlı, Qoçulu, Qarabucaq, Öyləqulu) CDMA-nın əhatə dairəsinə alınmışdır.

Ümumiyyətlə Kürdəmir rayonu üzrə 62 yaşayış məntəqəsindən 60-ı CDMA-nın əhatə dairəsinə daxil olmuşdur.

Balakən, Qax, Gəncə və Lənkəran TKQ-lərinin hər birində bir ədəd mini baza stansiyası quraşdırılmışdır. Balakən və Qaxda BTS-lər mərkəzi stansiyada quraşdırılmışdır.

Balakən rayonu üzrə əhatə dairəsinin test işləri başa çatdırılmış, 55 yaşayış məntəqəsindən 53 yaşayış məntəqəsi CDMA-nın əhatə dairəsinə daxil olmuşdur. 17 telefonlaşdırılmamış yaşayış məntəqəsinin hamısı əhatə dairəsinə alınmışdır.

Qax rayonu üzrə əhatə dairəsinin test işləri başa çatdırılmış, 58 yaşayış məntəqəsindən 54-ü, o cümlədən, telefonlaşdırılmamış 6 yaşayış məntəqəsindən 4-ü CDMA-nın əhatə dairəsinə daxil olmuşdur.

Gəncə TKİ-də Yeni Gəncə istiqamətində ATS-54-də və Lənkəran TKQ-də Vilvan kəndində mini BTS-lər quraşdırılmış, əhatə dairəsi genişləndirilmişdir.

Ümumiyyətlə, telefonlaşdırılmamış məntəqələrin telefonlaşdırılması layihəsinə uyğun olaraq “Aztelekom” İB-nin CDMA simsiz rabitə xidməti şəbəkəsində bu günə qədər 28 baza stansiyası istismara verilmiş və quraşdırılmış avadanlıqlar hesabına 82 telefonlaşmamış yaşayış məntəqəsi telefonlaşdırılmışdır.

Novxanı, Fatmayı, Xırdalan saytlarında və “Aztelekom”un əsas binasında yerləşən BTS-lərdə kanal tutumlarını artırmaq məqsədilə BSC-yə kanal kartları artırılmış, bu saytlarda kanal tutumlarının 64/128 konfiqurasiyasından 128/256 konfiqurasiyasına qədər artırılması təmin edilmişdir.

Azerfon” yeni tarif xidmətini təqdim edib

pchack — Wed, 17 Sep 2008 08:12:46 GMT

Azerfon” MMC (Nar Mobile ticarət nişanı) sentyabrın 1-dən etibarən “Ailəm” tarif xidmətini təqdim etmişdir. Şirkətdən bildirmişlər ki, yeni xidmət bütün ailə üzvlərinə istifadə etdikləri tarif planını dəyişmədən, öz aralarında ən ucuz tariflərlə ünsiyyətdə olmaq imkanını yaradır.

Güzəştli tariflə danışmaq üçün abonent öz fərdi qapalı qrupunu yaratmalıdır. “Ailəm”in başçısı tərəfindən yaradılan qrupa 1 nəfərdən 3 nəfərədək iştirakçı dəvət edilir. Hər abonent yalnız bir qrupa üzv ola bilər.

Qrupu yaratmaq üçün abonent *777#7#71#Yes kodunu yığmalı, yaxud SMS vasitəsilə 7#71 kodunu 777 nömrəsinə göndərməli və ya 7777 nömrəsinə zəng etməlidir.

Bu yolla xidməti aktivləşdirdikdən sonra “Ailəm” qrupuna yeni iştirakçıları dəvət etmək lazımdır. Qrup başçısı bunun üçün *777#7#72# abonentin nömrəsi # Yes şifrəsini yığmalı, yaxud 777 nömrəsinə SMS vasitəsilə 7#72# abonentin nömrəsi kodunu göndərməli və ya 7777 nömrəsinə zəng etməlidir.

Dəvət olunan abonentlər “aile” sözünü SMS vasitəsilə 777 nömrəsinə göndərməklə dəvəti qəbul edirlər və qrupun üzvü olurlar. Bundan başqa, şirkət “Bonus mövsümü” aksiyasını oktyabrın sonunadək uzadıb.

Kampaniyada öncədən ödənişli “Nar Mobile” tarif planlarının (Nar Mobile məkanı, Həvəskar, Xoş xəbər, Rəngarəng zövqlər, Məqsədə doğru) abonentləri iştirak edirlər. Kampaniyaya yalnız 5 AZN, 10 AZN, 20 AZN və 50 AZN nominallı ödəniş kartları daxildir.

Kampaniyanın şərtlərinə əsasən, abonentlər sadəcə balanslarını artırmaqla ölkədaxili bütün istiqamətlərə 525 pulsuz dəqiqə, 50 SMS və 50 MMS-ə qədər pulsuz bonus əldə etmiş olurlar.

Balans bir neçə dəfə artırıldıqda, bütün bonuslar-pulsuz dəqiqələr, SMS və MMS-lər cəmlənir.